Kasaysayan sa likod ng
SARMIENTO UGAT-UGNAYAN
Isang makabuluhang paniniwala na sa bawat kalungkutang dumarating sa buhay ng isang tao, ito ay may katapat na isang magandang pangyayari. Noong ika-3 ng Marso, 2000 sumakabilang buhay ang panganay na anak nina G. at Gng Pedro Sarmiento ng Bgy Malaya, Nagcarlan, Laguna. Nakiramay ang mga kamag-anak na sa Sarmiento mula sa San Pablo City, Sta. Cruz, Liliw, Rizal, Calauan, at Nagcarlan, Laguna. Dito nabuo ang katanungang "Kapag may namatay lang ba tayong maaaring magkita-kita?" Nagkaroon ng iba't-ibang mungkahi at napagkasunduan ang pagkakaroon ng isang pagtipon na gaganapin sa ika-29 ng Abril, 2000 na pamamahalaan ng mga Sarmiento mula sa Nagcarlan sa pangunguna nina Apolinar at Isabelo Sarmiento.
Ika-13 ng Marso, 2000 nag-umpisa ang paghahanap ng iba't-ibang pamilyang Sarmiento sa buong Laguna at mga karatig na lalawigan. Noong ika-28 ng Marso, 2000 napagkaisahan ng grupo nina Apolinar at Isabelo Sarmiento, Nelia S. Consignado, Mely, Novie at Melanio Sarmiento na magsadya kay Hen. Recaredo Sarmiento II sa siyudad ng Lucena upang ipaalam ang balak na pagtitipon. Buong puso silang tinanggap ng butihing heneral bilang mga kamag-anak at magmungkahi pa sa grupo na hanapin ang iba pang mga ka-Sarmiento sa iba't-ibang bayan at lalawigan upang makasama sa binabalak na pagtitipon.
Sa loob ng mahigit na isang buwan, matiyaga at walang kapagurang paghanap at paghahanda sa isang matagumpay na pagsasama-sama ng mga pamilyang Sarmiento ang nangyari. Ang pagtitipong ito ay naganap noong ika-29 ng Abril, 2000 sa Gemini Resort, Nagcarlan, Laguna na dinaluhan ng mga pamilyang Sarmiento mula sa tatlumpong bayan, limang lungsod at mga lalawigan ng Laguna, Batangas, Bulacan, Camarines Sur, Cavite, Nueva Ecija, Quezon, Rizal at Zambales. Sa pagtitipong ito ay nagkaisa at masayang nagkakilala ang angkang Sarmiento na ang layunin ay paunlarin ang isang matibay na ugnayan at taunang pagsasama-sama. Ang ikalawang pagtipon ay muling matagumpay na naganap noong ika-1 ng Mayo, 2001 sa Ouan's Worth Farm, Bgy Kanlurang Mayao, lunsod ng Lucena sa lugar nina Hen. Recaredo Sarmiento II. Sa ikatlong pagkakataon, ang malawakang pagtitipon ng mga pamilyang Sarmiento ay gaganapin sa ika-1 ng Mayo, 2002 sa Nasugbu Park, Nasugbu, Batangas sa pamamahala nina G. at Gng. Juanito M. Sarmiento.
Mula sa tatlong pagtitipong ito, magpapatuloy ang isang matibay at mahalagang adhikain para sa pamilyang Sarmiento sa pamamagitan ng gabay ng Poong Maykapal at pagtutulungan ng pamunuan at mga kasapi para maisakatuparan ang isang malinis na layuning sinimulan.
